Breve descrición

O Boletín Galego de Literatura (BGL) é unha publicación científica de acceso libre e periodicidade semestral, editada polo Grupo de Investigación LITER21 (GI-1839-Literatura galega. Literatura Infantil e Xuvenil. Investigacións literarias, artísticas, interculturais e educativas) do Instituto de Ciencias da Educación (ICE)-Universidade de Santiago de Compostela. Creouse no 1989 co obxectivo de dar soporte e difusión a traballos de investigación sobre literatura, en xeral, escritos en lingua galega que, doutra maneira, poderían ficar inéditos por falta de apoio.

A revista saíu impresa, sen interrupcións, entre o ano do seu inicio até o número 46 (máis tres monográficos), correspondente ao segundo semestre de 2011. Nese momento, a Universidade de Santiago de Compostela promoveu un proxecto polo que se suprimiron todas as edicións analóxicas para proceder a publicar exclusivamente en formato dixital as revistas dependentes do seu Servizo de Publicacións e Intercambio Científico.

O director da publicación é o doutor Anxo Tarrío Varela e a secretaría está formada por Marta Neira Rodriguez, Verónica Pousada Pardo e Armando Requeixo Cuba.
Acepta traballos escritos en galego, castelán, portugués, catalán, francés, italiano, inglés e alemán, aínda que todos, excepto os portugueses e os que teñan por destino a sección “Documentos”, aparecerán en galego co permiso do/s autor/es.