Armando Requeixo
Marta Neira Rodríguez
24 Xaneiro 2022
Carol Gillanders
25 Xaneiro 2022
Armando Requeixo
Profesor Asociado de Universidade
Breve biografía
É crítico literario e investigador. Profesor da Universidade de Santiago de Compostela e secretario do Centro Ramón Piñeiro para a Investigación en Humanidades, é tamén coordinador de Actividades e Publicacións da Casa-Museo Álvaro Cunqueiro.
Como ensaísta e estudoso ocupouse da obra de Álvaro Cunqueiro, Luís Seoane, Aníbal Otero, Eduardo Lence-Santar, Xosé Díaz Jácome, Celso Emilio Ferreiro, Álvaro de las Casas, Arcadio López-Casanova, Victoriano Taibo, Manuel Leiras Pulpeiro, Daniel Pernas Nieto, Ramón Piñeiro, Xosé Neira Vilas, Fernando Pérez-Barreiro Nolla ou Luísa Villalta, entre outros. Ao lucense Ánxel Fole dedicou a Tese de Licenciatura en 1996, pola que obtivo o Premio Extraordinario da USC. Pola súa banda, ao guitiricense Xosé María Díaz Castro consagrou a Tese de Doutoramento no 2014, tamén Premio Extraordinario da USC.
Membro da Asociación Galega da Crítica, a Asociación Española de Críticos Literarios e mais da Asociación de Escritor@s en Lingua Galega, recibiu varias distincións polo seu labor, entre elas o Premio Xerais á Cooperación Editorial 2004, o Premio Literario Ánxel Fole 2010 ou o Premio Xornalístico Manuel Reimóndez Portela 2017.
Dende o 2016 dirixe os Cadernos Ramón Piñeiro e as coleccións Láncara de Poesía e Narrativa Recuperada no seo do Proxecto Recuperación de Textos Literarios e Xornalísticos Galegos, do que é o principal responsable no CRPIH, onde tamén dirixe o Proxecto Bibliografía da Literatura Galega. Dende decembro do 2019 dirixe tamén os cadernos da Colección Selva de Esmelle e a colección Papel de Color, publicacións da Casa-Museo Álvaro Cunqueiro.
Como crítico literario exerce como comentarista habitual nos xornais do Grupo Editorial Prensa Ibérica (Faro de Vigo, La Opinión) e do Grupo La Capital (El Ideal Gallego, Diario de Ferrol, Diario de Arousa, Diario de Bergantiños), ademais de no Diario Cultural da Radio Galega. Unha parte representativa dese seu labor como comentarista do libro galego nos medios foi recollida no volume Criticalia (2011). Co mesmo nome, mantén dende febreiro do 2011 un blog de comentario e análise literarios.
Publicacions destacadas
- Neira Rodríguez, M. & Requeixo, A. (eds). (2021): Verbas amigas: Estudos en homenaxe a Blanca Ana Roig Rechou, Santiago de Compostela, Xunta de Galicia.
- Requeixo Cuba, A. & Tarrío Varela, A. (ed.) (2020): Caderno Ramón Piñeiro (XL). Estudos arredor de Ricardo Carvalho Calero, Santiago de Compostela, Centro Ramón Piñeiro para a Investigación en Humanidades – Xunta de Galicia.
- Requeixo Cuba, A. (ed. Lit.) (2020): Luísa Villalta. As palabras ingrávidas, Santiago de Compostela, Centro Ramón Piñeiro para a Investigación en Humanidades – Xunta de Galicia.
- Requeixo Cuba, A. (2020): “As Bretañas de Cunqueiro”, en Villares, R.; Botrel, J.F. & Rivalan Guégo, C. (coord.) (2020): Galicia-Bretaña: Olladas comparadas, Santiago de Compostela, Consello da Cultura Galega, pp. 267-282.
- Fernández Castro, J.A. & Requeixo Cuba, A. (2019): Os nomes do vento, Silleda, Edicions Fervenza.
- Bouzas Gorgal, B. & Requeixo Cuba, A. (Eds.) (2019): Roseiras de rosas roxas: Premio de Poesía Manuel Leiras Pulpeiro 2012-2018, Mondoñedo, Concello de Mondoñedo.
- Requeixo Cuba, A. (2019): “Primeiro cuarto de século do Centro Ramón Piñeiro para a Investigación en Humanidades”, en Eduga: revista galega do ensino, Nº 77, 35 pág.